Rrokum HD

Lieberman: Qëndrimi për Kosovën në kohën e duhun

03 Gusht 2012 - 06:03
Lieberman: Qëndrimi për Kosovën në kohën e duhun

 

"Me m’thanë dikush asokohe kur isha student n’Bashkimin Sovjetik, se nji ditë kam me u ba ministër i Jashtëm i Izraelit dhe kam me ardhë n’Shqipni me inaugurue hapjen e ambasadës izraelite n’Tiranë, nuk e kisha besue kurrë. Ky takim asht nji provë se si vendet tona kanë ndryshue gjatë këtyne 20 vjete me dinamikë dhe sfida të mëdha, si kanë evoluer marradhanjet midis dy vendeve, midis dy kombeve dhe miqve. Arsyeja ime e ardhjes n’Tiranë asht vetëm kjo, inaugurimi që i bahet ambasadës n’Tiranë, në mënyrë që këto dy vende me thellue bashkëpunimin mes tyne”, deklaroi n’Tiranë Avigdor Lieberman, ministër i Jashtëm i Izraelit në konferencën e përbashkët për shtyp me homologun shqiptar, Edmond Panariti.

Pyetjes pse Izraeli nuk e ka njoft Kosovën, Lieberman tha se qëndrimi i Izraelit nuk lidhet vetëm me Kosovën, por me tanë rajonin e Ballkanit.

“S’pari, nga eksperienca jonë si Lindje e Mesme, na shpresojmë se kjo pjesë e botës ka me i zgjidhë problemet e saj në mënyrë paqësore. Shpresoj se keni me gjetë zgjidhje paqësore, qoftë nëpërmjet bisedimeve dypalëshe, ashtu edhe nëpërmjet negocimeve të drejtpërdrejta. Rajoni jonë asht pjesa ma e komplikueme e botës, na kemi mjaft situata të komplikueme jo vetëm në rajon, por edhe çashtje të mbrendshme. Qëndrimi jonë lidhet me tanë rajonin e Ballkanit, ku përfshihet edhe çashtja e Kosovës dhe shpresoj se të gjithë popujt e këtij rajoni kanë me i  zgjidhë problemet e tyne paqësisht”, njofton BalkanWeb.

Për këtë çashtje ministri Panariti tha se Izraeli i ka njoft pasaportat e Kosovës.

“Ndaj të njajtin vlerësim si zoti Lieberman, për forcimin e dialogut të niveleve të bashkëpunimit rajonal midis Shqipnisë dhe Kosovës, midis Shqipnisë dhe vendeve tjera të rajonit dhe kjo padyshim asht rruga ma e mirë për integrimin e krejt rajonit n’Unionin Europian. Për sa i përket çashtjes së Kosovës, padyshim që progres ka ndodhë, pasaportat e Kosovës tashma njihen nga shteti i Izraelit. Ky asht tregues shumë i randësishëm, vlerësim shumë objektiv i situatës rajonale”.

 





 

Në Rrokum TV
LAJMET QENDRORE (21. 08. 2014)