Arrestohen edhe 4 aktivistë të Vetëvendosjes

Policia e Kosovës ka arrestue katër aktivistë tjerë të Lëvizjes Vetëvendosje.

Arrestimin e Zgjim Hyseni, Egzon Azemi, Arbër Morina dhe Lekë Isufi e ka konfirmue vet VV.

Simbas VV’s, ata u arrestuen derisa po kryenin nji aktivitet për 8 Marsin – Ditën Ndërkombëtare të Grues.
Ky asht njoftimi i VV’s:
Vazhdon gjuetia e Policisë ndaj aktivistëve të VETËVENDOSJE!-s
Policia e Kosovës vazhdon gjuetinë ndaj aktivistëve të Lëvizjes VETËVENDOSJE!. Aktivistët Zgjim Hyseni, Egzon Azemi, Arbër Morina dhe Lekë Isufi janë arrestuar gjatë periudhës që po merreshin me aktivitetet e planifikuara për datën 8 Mars, Ditën Ndërkombëtare të Gruas.
Arsyet pse policia i ka arrestuar aktivistët, si zakonisht nuk janë bërë të ditura. Atyre nuk i është treguar asnjë fletarrest, dhe sipas traditës së shtetit policor, thjesht janë kidnapuar në një aksion të papritur ku janë angazhuar policë të uniformuar dhe policë civilë.
Organizimi i këtij arrestimi në mes të një rruge kryesore të Prishtinës, në një orar tepër të frekuentuar prej këmbësorëve, tregon se sulmet policore të urdhëruara nga pushteti kriminal, kanë si synim edhe terrorizimin e qytetarëve.
Kërkojmë lirimin e menjëhershëm të aktivistëve, dhe dënimin e urdhërdhënësve e zbatuesve të këtyre veprimeve të përndjekjes politike.