Çollaku: Viti 2016, vit i integrimit europian për kosovarët

Ministri i Integrimeve Europiane, Bekim Çollaku, ka pritë sot në takim shefen e re të Zyrës së Bashkimit Europian në Kosovë, Nataliya Apostolova.

Çollaku ka thanë se në këtë takim ka njoftue Nataliya Apostolova, për angazhimin e institucioneve të Kosovës në integrimin në BE, që viti 2016 ka me qenë vit i integrimit europian.

Postimi i plotë i tij:

Sot pata një takim njoftues me shefen e re të Zyrës së Bashkimit Evropian në Kosovë/Përfaqësuesen Speciale të BE, znj.Nataliya Apostolova, të cilës i dëshirova mirëseardhje në Kosovë. Shpreha përkushtimin e institucioneve për të vazhduar bashkëpunimin me Zyrën e BE-së në drejtim të avancimit të agjendës evropiane për Kosovën.

E njoftova znj. Apostolova për përkushtimin dhe angazhimet tona në avancimin e agjendës së integrimit të Republikës së Kosovës në BE, dhe faktin që jemi duke punuar shumë për të siguruar se viti 2016 të jetë vit i integrimit evropian, duke siguruar progres në zbatimin e Marrëveshjes për Stabilizim Asociim që ka hyrë në fuqi këtë vit, dhe duke siguruar vendimin për liberalizimin e vizave për qytetarët e Republikës së Kosovës, pavarësisht sfidave të fundit. Agjenda evropiane është një vizion afatgjatë dhe nuk duhet lejuar që sfidat që shfaqen herë pas here të jenë dekurajuese. Ne do të tejkalojmë këto sfida sepse e ardhmja e vendit tonë është në Bashkim Evropian sepse ky është vizioni i të gjithë qytetarëve të Republikës së Kosovës.