Kryeministri: Me Rifat Jasharin kam me u takue në nji atmosferë tjetër, me folë për temat e Kosovës

Kryeministri i Kosovës, Isa Mustafa, bani homazhe pranë varrit të Komandantit Legjendar Adem Jashari dhe varrezave të familjes Jashari në kompleksin memorial “Adem Jashari” në Prekaz, në kuadër të manifestimit për shënimin e 18 vjetorit të Epopesë së Ushtrisë Çlirimtare të Kosovës.
I shoqëruem nga ministra të kabinetit qeveritar, Kryeministri ka përkujtue trimëninë dhe sakrificën ma të madhe që nji familje shqiptare ka dhanë për pamvarësinë dhe lirinë e Kosovës.
Sot këtu po i bëjmë nderimet Familjes Jashari, të gjithë atyre që ranë për lirinë dhe pavarësinë e Kosovës. Sot, po përkujtojmë veprimet më brutale, më shtazarake të ushtrisë dhe forcave paramilitare serbe që ndodhën në Kosovë, por po ashtu edhe trimërinë dhe sakrificën më të madhe të një familje shqiptare që dha për pavarësinë dhe lirinë e Kosovës. Unë mendoj se kjo vepër e Familjes Jashari, e trimave që ranë këtu dhe u sakrifikuan këtu, do të jetë pjesë e veçantë e historisë së Kosovës, e cila do të përshkruajë viktimizimin dhe sakrificën më të madhe të një familje, të shqiptarëve që dhanë për lirinë e këtij vendi”, tha Kryeministri Mustafa.
Ma mbas Kryeministri Mustafa ka vizitue edhe Muzeun, në të cilin janë të ekspozueme eksponate nga qëndresa dhe lufta heroike e familjes Jashari dhe u shënue në librin e kujtimeve.
I pyetur se pse nuk po e viziton Familjen Jashari, Mustafa ka thanë se me Rifatin ka me u takue në nji atmosferë tjetër për me bisedue për tema të ndërtimit të Kosovës.
Sa i përket familjes unë vetëm kisha me ju përkujtu se 3 ditë apo 4 ditë pas ngjarjes unë e kam vizituar bacën Rifat në Munih, dhe atëherë ai ka thënë se nuk ka nevojë të hapet e pame për Familjen Jashari, sepse e gjithë Kosova është në luftë dhe se nuk po vdesin vetëm bijtë e Familjes Jashari, por po vdesin bijtë e Kosovës, dhe ka thënë se ai e ndjen vetën keq që nuk ka qëlluar atëherë të vdes dhe të luftoj me gjithë të tjerët. Përndryshe, nuk ka asnjë arsye të mërzitet dhe të hidhërohet për vdekjen e familjarëve të tij, sepse ata e dinë pse kanë vdekur dhe si kanë vdekur. Kanë vdekur për lirinë dhe pavarësinë e këtij vendi. Por ka thënë se mërzitet që kanë mbetur atëherë kufomat jashtë dhe nuk po mund t’i varros. Dhe unë edhe sot në qoftë se shkoj në familje e di përgjigjen e Rifatit. Dhe do të shfrytëzoj rastin që në një atmosferë krejt tjetër të shkoj të bisedoj me ta, por të bisedoj për temat e ndërtimit të kësaj shoqërie, për temat e Kosovës, ndërkaq për trimërinë e tyre kanë folur ata që e kanë dhënë jetën”, ka thanë kryeministri Mustafa.