LDK i reagon Thaçit: S’je i autorizuem për bisedime me Serbinë

Lidhja Demokratike e Kosovës i ka reague ashpër Presidentit Hashim Thaçi, për takimin e tij për dialogun në mes të Kosovës dhe Serbisë, që u zhvillue sot në nivel Presidentësh në Bruksel.

LDK i ka quejt këto bisedime “të pa autorizueme me Serbinë”, kështu tue e quejt Presidentin “Kryetar i Kosovës”.

“…Kryetari i Kosovës, z. Hashim Thaçi pa lejen e organeve ligjvanëse dhe kry në vete ka fillue bisedime të pa autorizueme me Serbinë”, thuhet në reagimin e LDK’s dërgue mediave.

 

Reagimi i plotë i Lidhjes Demokratike të Kosovës:

 

Deklaratë për Medie

Prishtinë, 31 gusht 2017

Lidhja Demokratike e Kosovës, reagon ndaj bisedimeve të pa autorizuara me Serbinë, të Kryetarit të Kosovës, z. Hashim Thaçi.

LDK-ja vlerëson se Kryetari i Kosovës, z. Hashim Thaçi, i gjendur në një pozicion periferik sa i përket fuqisë politike, institucionale dhe i pa mundur të vendosë në funksion të tij, institucionet vendimarrëse të vendit, Kryetari i Kosovës, z. Hashim Thaçi pa lejen e organeve ligjvënëse dhe kokë në vete ka filluar bisedime të pa autorizuar me Serbinë.

Në funksion të qëllimeve të tij meskine dhe për të kthyer reflektorët politikë kah vetja, në kohën kur partia e tij po vazhdon të mbajë peng formimin e institucioneve edhe pse është në kuotat më të ulëta historike të fuqisë së saj politike, z. Thaçi ka hedhur idenë e krijimit të një kinse “Grupi Uniteti” për bisedimet me Serbinë. Kjo jo për t`i funksionalizuar këto bisedime por për të vendosur vetën në qendër të tyre dhe për t`u prezantuar para miqve ndërkombëtarë si i vetmi faktor uniteti në vend.

Tashmë lojërave të tij u ka dalur ngjyra. Uniteti nuk ndërtohet duke zhvendosur fuqinë politike te institucionet pa tagër vendimarrës e ekzekutues.

Është Qeveria e Republikës së Kosovës, e mandatuar nga Kuvendi i Republikës së Kosovës ajo e cila ndërton platformën, udhëheqë bisedimet eventuale dhe implementon marrëveshjet.

Çdo gjë tjetër dhe nga çdo kush tjetër Lidhja Demokratike e Kosovës e konsideron të dëmshme, jo legjitime dhe antikushtetuese.

Lidhja Demokratike e Kosovës është e përkushtuar që sa më parë, institucionet ekzekutive të vendit të themelohen dhe të marrin përgjegjësitë e veta karshi obligimeve të tyre të brendshme dhe ndërkombëtare.

Zyra për Informim – LDK