Sejdiu i VV’s: Po arrestohemi me urdhna politik!

Nënkryetari i Levizjes Vetëvendosje, Dardan Sejdiu, ka shkrue në llogarinë e tij në Facebook se deputetët e Vetëvendosjes po arrestohen me urdhna politikë të dhanë nga Qeveria, që simbas tij, asht e kriminalizueme dhe e korruptueme.

Sejdiu këto komente i ka ba mbas arrestimit të deputetit të Vetëvendosjes, Driton Çaushi.

Ky asht postimi i plotë:

Deputetët e Lëvizjes VETËVENDOSJE! vazhdojnë të arrestohen me urdhra politikë. Policia e Kosovës ka arrestuar sot në Kuvend, deputetin Driton Çaushi për shkak të aksionit të tij politik për ta ndalur procedimin e marrëveshjes për demarkacionin me Malin e Zi.
Këto urdhra të përndjekjes politike për VETËVENDOSJE!-n po zbatohen në kohën e lulëzimit të krimit dhe korrupsionit nga Qeveria. Organet e Drejtësisë kanë shumë punë për të bërë. Ata do të duhej të hetonin vetë Komisionin e Murat Mehës që e ka propozuar këtë marrëveshje, aferën ‘Pronto’, ‘dosjen e shefave’, skandalin e pasaportave e shumë skandale të tjera.

Ne kërkojmë lirimin e menjëhershëm të deputetit Driton Çaushi. Poashtu, e paralajmërojmë qeverinë kuislinge që nuk mund të vazhdojë me kalimin e kësaj marrëveshjeje. Kosova nuk ka tokë për të falur, kurse verpimet e tyre nuk mund të na ndalin e as frikësojnë në mbrojtjen e territorit dhe sovranitetit të Republikës.