Vendet e QUINT’it reagojnë ashpër: Shfuqizimi i Speciales i jep fund partneritetit me neve

Ambasada e Shteteve të Bashkueme të Amerikës në Prishtinë, përmes nji deklarate të përbashkët në emën të vendeve të Quintit, ka thanë se janë “thellësisht të shqetësuem me përpjekjet e vazhdueshme me zhvleftësue punën e Dhomave të Specializueme, si dhe vendimin e Presidentit me i falë tre të dënuem për vrasje, në të ashtuquejtunin ‘rasti i familjes Hajra’”.

Ambasada thotë se Dhomat e Specializueme, në veçanti janë pjesë e randësishme e përkushtimit të Kosovës për sundim të ligjit dhe angazhimit të Kosovës për me i adresue krimet e kryeme në territorin e saj.

“Vendet e QUINT-it kanë qenë prej kohësh miq të vërtetë të Kosovës, përfshirë këtu edhe në kohërat më të vështira. Që nga mbështetja jonë për ndërhyrjen e NATO-s, sakrifikimin e ushtarëve tanë në Kosovë, njohjen e menjëhershme të pavarësisë së Kosovës dhe mbështetjen tonë të vazhdueshme në zhvillimin tuaj, ne kemi punuar shumë për të mbështetur vendin tuaj. Suksesi juaj është në interesin tonë. Megjithatë, ne do të këmbëngulim gjithmonë që Kosova të mbështesë drejtësinë”, thuhet në reagimin e Ambasadës amerikane në Prishtinë.

Simbas Ambasadës, nuk ka asnji arsye me e pengue punën e Dhomave të Specializueme.

Ftojmë secilin kryesues të institucioneve, udhëheqës të partive apo deputet, të heqin dorë nga çdo tentim për të shfuqizuar apo ri-negocuar çfarëdo pjese të Ligjit për Dhomat e Specializuara. Një veprim i tillë vë në pikëpyetje përkushtimin e Kosovës për sundimin e ligjit dhe rrezikon të gjitha të arriturat e Kosovës. Kjo i vë interesat e individëve mbi interesat e shoqërisë kosovare. Ne e dënojmë një gjë të tillë, dhe kushdo që mbështetë një gjë të tillë, do të veprojë qëllimisht kundër partneritetit të Kosovës me vendet tona. Ftojmë të gjithë liderët të Kosovës dhe deputetët e Kuvendit të Kosovës të ngrenë zërin kundër kësaj iniciative dhe me sinqeritet të plotë të informojnë qytetarët e Kosovës për pasojat e rënda negative, përfshirë këtu edhe procesin e integrimit ndërkombëtarë dhe Euro-Atlantik të Kosovës, nëse Kosova vazhdon në këtë mënyrë. Në të njëjtën kohë, presim që të gjitha shtetet të ndjekin penalisht ose të bashkëpunojnë në plotni, në gjykimin e krimeve të supozuara, të kryera në Kosovë”, thuhet në reagim.

Ambasada e SHBA thotë gjithashtu se krijimi i Dhomave të Specializueme ishte mënyra e vetme për Kosovën të dëshmojë përkushtimin e saj për drejtësi dhe sundim të ligjit, dhe të vazhdojë me pranue mbështetjen ndërkombëtare.

“Me ndihmën tonë, Kosova ka shënuar përparim në shtatë vitet e fundit për arsye të përkushtimit të saj për drejtësi ndërkombëtare. Vendimi i Kuvendit në vitin 2015 për të krijuar Dhomat e Specializuara ishte shenjë e qartë se Kosova refuzoi kulturën e mosndëshkimit. Nuk kishte asnjë marrëveshje ndërmjet komunitetit ndërkombëtarë dhe Kosovës lidhur me krijimin e Dhomave të Specializuara”, thuhet në fund të këtij reagimi.

Shperndaje në: