Veseli kërkon mbështetjen e Holandës për liberalizimin e vizave

Kryetari i Kuvendit të Kosovës, Kadri Veseli, asht prit sot në nji takim të posaçëm nga Presidentja e Senatit holandez, Ankie Broekers-Knol, me të cilën ka diskutue për zhvillimet politike në Kosovë dhe në Rajon, për perspektivën europiane dhe në mënyrë të veçantë, për mbështetjen e Holandës, në procesin për liberalizimin e vizave për qytetarët e Kosovës.

Në takim me homologen në Holandë, Kryeparlamentari Veseli ka paraqit të arritunat e Kosovës, ndërsa ka kërkue që Holanda me marrë qëndrim pozitiv në raport me Kosovën për liberalizimin e vizave, mbasi siç tha ai, Kosova ka përmbush të gjitha kriteret e nevojshme.

 

Lexoni lajmin e plotë:

 

Sipas njoftimit nga zyra e Kryetarit të Kuvendit, Veseli tha se qytetarët e Kosovës e meritojnë lëvizjen e lirë në Zonën Shengen dhe nuk do të shkelin detyrimet që dalin nga lëvizja e lirë.

Duke e falënderuar homologen holandeze për mbështetjen e shtetit të saj ndaj Kosovës në vazhdimësi, kryetari i Kuvendit e njohu atë me përparimet në Kosovë në shumë fusha dhe angazhimet e institucioneve të saj për reforma që stimulojnë veçanërisht zhvillimin ekonomik.

“Përpjekja ime tanimë është shumë e qartë. Qytetarët e Kosovës meritojnë liberalizimin e vizave. Pasi që kemi përmbushur të gjitha kriteret e përcaktuara, duam që kah fundi i këtij viti qytetarët tanë të kenë mundësi të lëvizin lirshëm në Zonën Shengen. Vizitat nëpër vende të BE-së, sikurse kjo e tanishmja në Holandë, kanë të bëjnë me përpjekjet tona për t’i bindur instancat më të larta shtetërore të këtyre vendeve që të ushtrojnë ndikimin e tyre pozitiv për liberalizimin e vizave. Holanda është një nga mbështetëset kryesore të vendit tonë, e cila e ka njohur pavarësinë që në fillim dhe tani është investuese permanente në shtetndërtimin dhe progresin në Kosovë”, tha kryeparlamentari Veseli.

Kryesenatorja holandeze, Ankie Broekers-Knol, tha se në Senatin e Holandës Kosova gëzon përkrahje nga çdo përbërje e tij, ndërsa konfirmoi mbështetjen për procesin e integrimeve evropiane të Kosovës.

Bashkëbiseduesit u dakorduan për mundësitë e thellimit të marrëdhënieve ndërparlamentare, ekonomike dhe diplomatike me interes të të dyja vendeve.

 

Shperndaje në: