Isa Mustafa i premë ndaj Albin Kurtit: Ke veprue gabim!

Kryetari i Lidhjes Demokratike të Kosovës, Isa Musfata, ka thanë se vendimi për heqjen e pjesshme të taksës prej 100 përqind ndaj produkteve që vijnë nga Serbia dhe Bosnja e Hercegovina asht dashtë ma s’pari me u trajtue në Qeveri dhe mandej me u publikue.

Në nji intervistë për Klan Kosovën, Mustafa ka thanë se tash kemi të bajmë me nji kërkesë eksplicite të Shteteve të Bashkueme ku theksohet se tarifa duhet me u heqë dhe mos me u zavendësue me masën e reciprocitetit.

“Kemi një kërkesë më eksplicite të Shteteve të Bashkuara të Amerikës që tarifa të hiqet dhe të mos zëvendësohet me reciprocitet. Ka edhe një deklaratë nga Bashkimi Europian që e përshëndesin si hap propozimin e dhënë nga Kryeministri Albin Kurti”.

“Unë mendoj se duhet të ulemi me bashkësinë ndërkombëtare [SHBA-në dhe BE-në] dhe të gjejmë një zgjidhje të pranueshme për të gjitha palët në mënyrë që të ndërmerren masat që tarifa të hiqet, por po ashtu të detyrohet Serbia që të heq dorë nga të gjitha masat jo-tarifore dhe të heq dorë prej propagandës ose fushatës që po e bënë kundër njohjeve të Kosovës edhe të hapet pastaj rruga për njohjen e ndërsjellë”.

“Mendoj se ka akoma hapësirë që me Lëvizjen Vetëvendosje të ulemi dhe t’i shohim të gjitha mundësitë, të gjejmë një zgjidhje e cila e ruan partneritetin me Shtetet e Bashkuara dhe Bashkimin Europian sepse Kosova e izoluar nuk ka perspektivë dhe ardhmëri”.

“Unë nuk po them se e përkrahi apo nuk e përkrahi njoftimin e kryeministrit Kurti lidhur me taksën. Atë që Kurti e dha mbrëmë është dashur të shtrohet në Qeveri. Vendimet publikisht jepen vetëm pasi t’i ketë aprovuar Qeveria”.

“Pa marrë parasysh se si e ka shtruar Kurti atë, ajo duhet me qenë çështje e Qeverisë. Vet fakti që SHBA-të u deklaruan qartë duke thënë se nuk e pranojnë kurrfarë heqje të pjesshme apo heqje me kushte, flet se jemi në një periudhë në të cilën ne prapë duhet të kthehemi dhe të dëgjojmë se çfarë po thonë SHBA-të, të ruajmë partneritetin me ta dhe në këtë frymë të bëjmë zgjidhjen e këtij problemi”.

Shperndaje në: